Hum se Abdul Aziz Bin Abdullah ne bayan kiya, kaha ke mujh se Yusuf Bin Majishoon ne bayan kiya, un se Salih Bin Ibrahim Bin Abdur Rahman Bin Auf ne, un se un ke baap ne, aur un se Salih ke dada Abdur Rahman Bin Auf (Radi Allahu Anhu) ne bayan kiya ke mein ne Umayyah Bin Khalaf se ye muahida apne aur us ke darmiyan likhwaya ke wo mere baal bacchon ya meri jayedad ki jo Makkah mein hai, hifazat kare aur mein us ki jayedad ki jo Madinah mein hai hifazat karoon. Jab mein ne apna naam likhte waqt Rahman ka zikar kiya to us ne kaha ke mein Rahman ko kya janoon. Tum apna wahi naam likhwao jo zamana-e-jahiliyat mein tha. Chunanche mein ne Abd Amr likhwaya. Badr ki larayi ke mauqe par mein ek pahar ki taraf gaya taake logon se aankh bacha kar is ki hifazat kar sakoon, lekin Bilal (Radi Allahu Anhu) ne dekh liya aur furan hi Ansar ki ek majlis mein aaye. Unhon ne majlis walon se kaha ke ye dekho Umayyah Bin Khalaf (kafir dushman-e-Islam) idhar maujood hai. Agar Umayyah kafir bach nikla to meri nakami hogi. Chunanche un ke sath Ansar ki ek jamaat humare peeche ho li. Jab mujhe khauf hua ke ab ye log humein aa leinge to mein ne is ke larke ko aage kar diya taake is ke sath (aane wali jamaat) mashghool rahe, lekin logon ne ise qatal kar diya aur phir bhi wo humari hi taraf barhne lage. Umayyah bahut bhaari jism ka tha. Aakhir jab jamaat-e-Ansar ne humein aa liya a to mein ne is se kaha ke zameen par lait ja. Jab wo zameen par lait gaya to mein ne apna jism us ke oopar daal diya. Taake logon ko rok sakoon, lekin logon ne mere jism ke neeche se us ke jism par talwar ki zarbat lagayein aur ise qatal kar ke hi chhora. Ek Sahabi ne apni talwar se mere paon ko bhi zakhmi kar diya tha. Abdur Rahman Bin Auf (Radi Allahu Anhu) is ka nishan apne qadam ke oopar humein dikhaya karte thay
.