Aur Ibn Sirin ne kaha ke zameen wale baghair muddat poori hue thekay-dar ko (ya is ke warison ko) bay-dakhal nahi kar sakte. Aur Hakam, Hasan aur Iyas Bin Muawiyah ne kaha ijarah muddat khatam hone tak baqi rahega. Aur Abdullah Bin Umar (Radi Allahu Anhuma) ne kaha Nabi Kareem (Sallallahu Alaihi Wasallam) ne Khaibar ka ijarah adhon aadh batayi par Yahoodiyon ko diya tha. Phir yahi theka Nabi Kareem (Sallallahu Alaihi Wasallam) aur Abu Bakr (Radi Allahu Anhu) ke zamana tak raha. Aur Umar (Radi Allahu Anhu) ke bhi shuru khilafat mein. Aur kahin ye zikar nahi hai ke Abu Bakr aur Umar (Radi Allahu Anhuma) ne Nabi Kareem (Sallallahu Alaihi Wasallam) ki wafat ke baad naya theka kiya ho
.

Hum se Musa Bin Ismail ne bayan kiya, kaha ke hum se Juwairiyah Bin Asma ne bayan kiya, un se Nafi ne aur un se Abdullah (Radi Allahu Anhu) ne ke Rasul Allah (Sallallahu Alaihi Wasallam) ne (Yahoodiyon ko) Khaibar ki zameen day di thi ke is mein mehnat ke sath kasht karein aur paidawar ka aadha hissa khud lay liya karein. Ibn Umar (Radi Allahu Anhuma) ne Nafi se ye bayan kiya ke zameen kuch kiraya par di jati thi. Nafi ne is kiraya ki tayein bhi kar di thi lekin wo mujhe yaad nahi raha
.