Abu Abdullah (Imam Bukhari Rahimahullah) ne kaha ke Liath Bin Saad ne bayan kiya ke mujh se Abdur Rahman Bin Khalid ne bayan kiya, un se Ibn Shihab ne, un se Salim Bin Abdullah ne, aur un se Abdullah Bin Umar (Radi Allahu Anhuma) ne bayan kiya, ke mein ne Ameer-ul-Momineen Usman (Radi Allahu Anhu) ko apni wadi-e-qura ki zameen, un ki Khaibar ki zameen ke badle mein bechi thi. Phir jab hum ne bai kar li to mein ulte paon un ke ghar se is khayal se bahar nikal gaya ke kahin wo bai faskh na kar dein. Kyunke shariat ka qaida ye tha ke bechne aur khareedne wale ko (bai torrne ka) ikhtiyar is waqt tak rehta hai jab tak wo ek doosre se juda na ho jayein. Abdullah (Radi Allahu Anhu) ne kaha ke jab hamari khareed-o-farokht poori ho gayi aur mein ne ghaur kiya to maloom hua ke mein ne Usman (Radi Allahu Anhu) ko nuqsan pohanchaya hai kyunke (is tabadala ke natija mein, mein ne un ki pehli zameen se) unhein teen din ke safar ki doori par Thamud ki zameen ki taraf dhakail diya tha aur unhon ne mujhe (meri masafat kam kar ke) Madinah se sirf teen din ke safar ki doori par la chora tha
.