Hum se Abdullah Bin Raja ne bayan kiya, kaha ke hum se Israel ne bayan kiya, un se Abu Ishaq ne, un se Abdul Rahman Bin Yazid ne ke hum Abdullah Bin Masood (Radi Allahu Anhu) ke sath Makkah ki taraf nikle (Haj shuru kiya) phir jab hum Muzdalifah aaye to aap ne do namazein (is tarah ek sath) parheen ke har namaz ek alag azan aur ek alag iqamat ke sath thi aur raat ka khana dono ke darmiyan mein khaya, phir tulu-e-subah ke sath hi aap ne namaz-e-Fajr parhi, koi kehta tha ke abhi subah sadiq nahi hui aur kuch log keh rahe thay ke ho gayi. Is ke baad Abdullah Bin Masood (Radi Allahu Anhu) ne farmaya ke Rasul Allah (Sallallahu Alaihi Wasallam) ne farmaya tha ye dono namazein is maqam se hata di gayeen hain, yani Maghrib aur Isha, Muzdalifah mein is waqt dakhil hon ke andhera ho jaye aur Fajr ki namaz is waqt. Phir Abdullah ujale tak wahin Muzdalifah mein thehre rahe aur kaha ke agar Ameer-ul-Momineen Usman (Radi Allahu Anhu) is waqt chalein to ye sunnat ke mutabiq ho ga. (Hadees ke rawi Abdul Rahman Bin Yazid ne kaha) mein nahi keh sakta ke ye alfaz un ki zaban se pehle nikle ya Usman (Radi Allahu Anhu) ki rawangi pehle shuru hui, aap daswein tareekh tak jamrah aqabah ki rami tak barabar labbaik pukarte rahe
.