Hum se Qutaiba Bin Saeed ne bayan kiya, unhon ne kaha ke hum se Laith Bin Saad ne Nafi se bayan kiya ke jis saal Hajjaj Abdullah Bin Zubair (Radi Allahu Anhuma) ke muqable mein larne aaya tha. Abdullah Bin Umar (Radi Allahu Anhuma) ne jab is saal Haj ka irada kiya to aap se kaha gaya ke Musalmanon mein baham jang hone wali hai aur ye bhi khatra hai ke aap ko Haj se rok diya jaye. Aap ne farmaya tumhare liye Rasul Allah (Sallallahu Alaihi Wasallam) ki zindagi behtareen namuna hai. Aise waqt mein mein bhi wahi kaam karoon ga jo Rasul Allah (Sallallahu Alaihi Wasallam) ne kiya tha. Tumhein gawah banata hoon ke mein ne apne oopar Umrah wajib kar liya hai. Phir aap chale aur jab Baida ke maidan mein pohanche to aap ne farmaya ke Haj aur Umrah to ek hi tarah ke hain. Mein tumhein gawah banata hoon ke mein ne apne Umrah ke sath Haj bhi wajib kar liya hai. Aap ne ek qurbani bhi sath le li jo Maqam-e-Qudaid se khareedi thi. Is ke siwa aur kuch nahi kiya. Daswein tareekh se pehle na aap ne qurbani ki na kisi aisi cheez ko apne liye jaiz kiya jis se (ihram ki wajah se) aap ruk gaye thay. Na sar mundwaya na baal tarshwaye daswein tareekh mein aap ne qurbani ki aur baal mundwaye. Aap ka yahi khayal tha ke aap ne ek tawaf se Haj aur Umrah dono ka tawaf ada kar liya hai. Abdullah Bin Umar (Radi Allahu Anhuma) ne farmaya ke Rasul Allah (Sallallahu Alaihi Wasallam) ne bhi isi tarah kiya tha
.