Aur Abu Humaid Saidi ne byaan kiya ke Rasool Allah salla Allahu alaihi wasallam ne farmaya main tumhein (Qayamat ke din is haal mein) woh shakhs dikhla doon ga jo Allah ki bargah mein gaaye ke saath is tarah aaye ga ke woh gaaye bolti hui ho gi . (Surah Moominoon mein lafz) «ju'aar» ( «khuwar» ke hum-maani) «taja'roon» (is waqt kehte hain jab) is tarah log apni awaaz buland karein jaise gaaye bolti hai .

Hum se Umar bin Hafs bin Ghiyath ne byaan kiya ‘ kaha ke hum se mere baap ne byaan kiya ‘ kaha ke hum se Aamash ne Maroor bin Suwaid se byaan kiya ‘ un se Abu Zar razi Allahu anhu ne byaan kiya ke main Nabi Karim salla Allahu alaihi wasallam ke qareeb puhanch gaya tha aur Aap salla Allahu alaihi wasallam farma rahe thay . Is zaat ki qasam jis ke haath mein meri jaan hai ya (Aap salla Allahu alaihi wasallam ne qasam is tarah khayi) is zaat ki qasam jis ke siwa koi mabood nahi . Ya jin alfaaz ke saath bhi Aap ne qasam khayi ho (is takeed ke baad farmaya) koi bhi aisa shakhs jis ke paas oont gaaye ya bakri ho aur woh is ka haq ada na karta ho to Qayamat ke din usay laya jaye ga . Duniya se zyada bari aur moti taaza kar ke . Phir woh apne maalik ko apne khuroon se raunde gi aur seeng maare gi . Jab aakhri jaanwar us par se guzar jaye ga to pehla jaanwar phir lout kar aaye ga . (Aur usay apne seeng maare ga aur khuroon se raunde ga) is waqt tak (yeh silsila barabar qaim rahe ga) jab tak logon ka faisla nahi ho jata . Is hadees ko Bukair bin Abdullah ne Abu Salih se riwayat kiya hai ‘ unhon ne Abu Hurairah razi Allahu anhu se aur unhon Nabi Karim salla Allahu alaihi wasallam se . Baab apne rishtadaron ko zakat dena aur Nabi Karim salla Allahu alaihi wasallam ne (Zainab ke haq mein farmaya jo Abdullah bin Masood ki biwi thi) is ko do guna sawab mile ga ‘ naata jorne aur sadqe ka .