(Is bab mein hadees nahi hai)
.

Aur (Surah Al-Noor mein) Allah Ta'ala ka farman ke "Wallazina yabtagoonal-kitaba mimma malakat aimanukum fakaatibuhum in alimtum fihim khairan wa aatuhum min maalillahillazi aatakum" "Tumhare londi ghalamou mein se jo bhi mukatabat ka mamla karna chahein. Un se mukatab kar lo, agar un ke andar tum koi khair pao. (Ke wo wada poora kar sakein ge) aur unhein Allah ke is mal mein se madad bhi do jo us ne tumhein ata kiya hai." Rauh Bin Ubadah ne Ibn Juraij (Rahimahullah) se bayan kiya ke mein ne Ata Bin Abi Rabah (Rahimahullah) se poocha kya agar mujhe maloom ho jaye ke mere ghalam ke paas mal hai aur wo mukatab banna chahta hai to kya mujh par wajib ho jaye ga ke mein is se mukatabat kar loon? Unhon ne kaha ke mera khayal to yahi hai ke (aisi halat mein kitabat ka mamla) wajib ho jaye ga. Amr Bin Dinar ne bayan kiya ke mein ne Ata se poocha, kya aap is silsile mein kisi se Riwayat bhi bayan karte hain? To unhon ne jawab diya ke nahi. (Phir unhein yaad aaya) aur mujhe unhon ne khabar di ke Musa Bin Anas ne unhein khabar di ke Sirin (Ibn Sirin Rahimahullah ke walid) ne Anas (Radi Allahu Anhu) se mukatab hone ki darkhwast ki. (Ye Anas Radi Allahu Anhu ke ghalam thay) jo maldar bhi thay. Lekin Anas (Radi Allahu Anhu) ne inkar kiya, is par Sirin, Umar (Radi Allahu Anhu) ki khidmat mein hazir hue. Umar (Radi Allahu Anhu) ne (Anas Radi Allahu Anhu se) farmaya ke kitabat ka mamla kar le. Unhon ne phir bhi inkar kiya to Umar (Radi Allahu Anhu) ne unhein darre se mara, aur ye ayat parhi "Fakaatibuhum in alimtum fihim khairan" "Ghalamou mein agar khair dekho to un se mukatabat kar lo". Chunanchay Anas (Radi Allahu Anhu) ne kitabat ka mamla kar liya
.

Lais ne kaha ke mujh se Yunus ne bayan kiya, un se Ibn Shihab ne, un se Urwah ne ke Aisha (Radi Allahu Anha) ne kaha ke Barira (Radi Allahu Anha) un ke paas aaein apne mukatabat ke mamle mein un ki madad hasil karne ke liye. Barira (Radi Allahu Anha) ko panch auqiya chandi panch saal ke andar panch qiston mein ada karni thi. Aisha (Radi Allahu Anha) ne kaha, unhein khud Barira (Radi Allahu Anha) ke azad karane mein dilchaspi ho gayi thi, (Aisha Radi Allahu Anha ne farmaya) ke ye batao agar mein unhein ek hi martaba (chandi ke ye panch auqiya) ada kar doon to kya tumhare malik tumhein mere hath bech dein ge? Phir mein tumhein azad kar doon gi aur tumhari wala mere sath qaim ho jaye gi. Barira (Radi Allahu Anha) apne malikou ke haan gayein aur un ke aage ye soorat rakkhi. Unhon ne kaha ke hum ye soorat is waqt manzoor kar sakte hain ke rishta-e-wala hamare sath rahe. Aisha (Radi Allahu Anha) ne kaha ke phir mere paas Nabi Kareem (Sallallahu Alaihi Wasallam) tashreef laye to mein ne Aap (Sallallahu Alaihi Wasallam) se is ka zikar kiya Aap (Sallallahu Alaihi Wasallam) ne farmaya ke tu khareed kar Barira (Radi Allahu Anha) ko azad kar de, wala to us ki hoti hai jo azad kare. Phir Rasul Allah (Sallallahu Alaihi Wasallam) ne logon ko khitab farmaya ke kuch logon ko kya ho gaya hai jo (mamlat mein) aaisi shartein lagate hain jin ki koi jarr (daleel) buniyaad Kitab-ullah mein nahi hai. Pas jo shaks koi aaisi shart lagaye jis ki koi asal (daleel, buniyaad) Kitab-ullah mein na ho to wo shart ghalat hai. Allah Ta'ala ki shart hi zyada haq aur zyada mazboot hai
.

Is bare mein Ibn Umar (Radi Allahu Anhuma) ki Nabi Kareem (Sallallahu Alaihi Wasallam) se Riwayat hai
.

Hum se Qutaiba ne bayan kiya, kaha hum se Lais ne bayan kiya Ibn Shihab se, unhon ne Urwah se aur unhein Aisha (Radi Allahu Anha) ne khabar di ke Barira (Radi Allahu Anha) un ke paas apne mamla mukatabat mein madad lene aaein, abhi unhon ne kuch bhi ada nahi kiya tha. Aisha (Radi Allahu Anha) ne un se kaha ke tu apne malikou ke paas ja, agar wo ye pasand karein ke tere mamla mukatabat ki poori raqam mein ada kar doon aur tumhari wala mere sath qaim ho to mein aisa kar sakti hoon. Barira (Radi Allahu Anha) ne ye soorat apne malikou ke samne rakkhi lekin unhon ne inkar kiya aur kaha ke agar wo (Aisha Radi Allahu Anha) tumhare sath sawab ki niyat se ye kaam karna chahti hain to unhein ikhtiyar hai, lekin tumhari wala to hamare hi sath rahe gi. Aisha (Radi Allahu Anha) ne is ka zikar Rasul Allah (Sallallahu Alaihi Wasallam) se kiya to Aap (Sallallahu Alaihi Wasallam) ne farmaya ke tu khareed kar unhein azad kar de. Wala to usi ke sath hoti hai jo azad kar de. Raavi ne bayan kiya ke phir Rasul Allah (Sallallahu Alaihi Wasallam) ne logon se khitab kiya aur farmaya ke kuch logon ko kya ho gaya hai ke wo aaisi shartein lagate hain jin ki koi asal (daleel, buniyaad) Kitab-ullah mein nahi hai. Pas jo bhi koi aaisi shart lagaye jis ki asal (daleel, buniyaad) Kitab-ullah mein nahi hai to is ko aaisi shartein lagana layak nahi khwah wo aaisi sau shartein kyun na laga le. Allah Ta'ala ki shart hi sab se zyada maqool aur mazboot hai
.

Hum se Abdullah Bin Yusuf ne bayan kiya, kaha hum ko Imam Malik ne khabar di Nafi se aur un se Abdullah Bin Umar (Radi Allahu Anhuma) ne bayan kiya ke Umm-ul-Momineen Sayyida Aisha (Radi Allahu Anha) ne ek bandi khareed kar ise azad karna chaha, is bandi ke malikou ne kaha ke is shart par hum mamla kar sakte hain ke wala hamare sath qaim rahe. Rasul Allah (Sallallahu Alaihi Wasallam) ne Aisha (Radi Allahu Anha) se farmaya ke un ki is shart ki wajah se tum na ruko, wala to usi ki hoti hai jo azad kare
.

Hum se Ubaid Bin Ismail ne bayan kiya, kaha hum se Abu Usama ne bayan kiya Hisham Bin Urwah se, wo apne walid se, un se Aisha (Radi Allahu Anha) ne bayan kiya ke Barira (Radi Allahu Anha) aaein aur kaha ke mein ne apne malikou se nau auqiya chandi par mukatabat ka mamla kiya hai. Har saal ek auqiya mujhe ada karna pare ga. Aap bhi meri madad karein. Is par Aisha (Radi Allahu Anha) ne kaha ke agar tumhare malik pasand karein to mein unhein (ye sari raqam) ek hi martaba de doon aur phir tumhein azad kar doon, to mein aisa kar sakti hoon. Lekin tumhari wala mere sath ho jaye gi. Barira (Radi Allahu Anha) apne malikou ke paas gayein to unhon ne is soorat se inkar kiya (wapas aa kar) unhon ne bataya ke mein ne aap ki ye soorat un ke samne rakkhi thi lekin wo ise sirf is soorat mein qabool karne ko tayyar hain ke wala un ke sath qaim rahe. Rasul Allah (Sallallahu Alaihi Wasallam) ne ye suna to Aap (Sallallahu Alaihi Wasallam) ne mujh se daryaft farmaya. Mein ne Aap (Sallallahu Alaihi Wasallam) ko mutla kiya to Aap (Sallallahu Alaihi Wasallam) ne farmaya ke tu unhein le kar azad kar de aur unhein wala ki shart lagane de. Wala to bahar-hal usi ki hoti hai jo azad kare. Aisha (Radi Allahu Anha) ne bayan kiya ke phir Rasul Allah (Sallallahu Alaihi Wasallam) ne logon ko khitab kiya. Allah ki hamd-o-sana ke baad farmaya, tum mein se kuch logon ko ye kya ho gaya hai ke (mamlat mein) aaisi shartein lagate hain jin ki koi asal (daleel, buniyaad) Kitab-ullah mein nahi hai. Pas jo bhi shart aaisi ho jis ki asal (daleel, buniyaad) Kitab-ullah mein na ho wo baatil hai. Khwah aaisi sau shartein kyun na lagali jayein. Allah ka faisla hi haq hai aur Allah ki shart hi mazboot hai kuch logon ko kya ho gaya hai ke wo kehte hain, Ae falan! azad tum karo aur wala mere sath qaim rahe gi. Wala to sirf usi ke sath qaim ho gi jo azad kare
.

Aur Aisha (Radi Allahu Anha) ne kaha ke mukatab par jab tak kuch bhi mutalba baqi hai wo ghalam hi rahe ga aur Zaid Bin Sabit (Radi Allahu Anhu) ne kaha, jab tak ek dirham bhi baqi hai (mukatab azad nahi ho ga) aur Abdullah Bin Umar (Radi Allahu Anhuma) ne kaha ke mukatab par jab tak kuch bhi mutalba baqi hai wo apni zindagi maut aur jurm (sab) mein ghalam hi mana jaye ga
.

Hum se Abdullah Bin Yusuf ne bayan kiya, unhon ne kaha hum ko Imam Malik (Rahimahullah) ne khabar di Yahya Bin Saeed se, wo Amrah Bint Abdur Rahman se ke Barira (Radi Allahu Anha) Aisha (Radi Allahu Anha) se madad lene aaein. Aisha (Radi Allahu Anha) ne is se kaha ke agar tumhare malik ye soorat pasand karein ke mein (mukatabat ki sari raqam) unhein ek hi martaba ada kar doon aur phir tumhein azad kar doon to mein aisa kar sakti hoon. Barira (Radi Allahu Anha) ne is ka zikar apne malik se kiya to unhon ne kaha ke (hamein is soorat mein ye manzoor hai ke) teri wala hamare sath hi qaim rahe. Malik ne bayan kiya, un se Yahya ne bayan kiya ke Amrah ko yaqeen tha ke Aisha (Radi Allahu Anha) ne is ka zikar Rasul Allah (Sallallahu Alaihi Wasallam) se kiya to Aap (Sallallahu Alaihi Wasallam) ne farmaya ke tu ise khareed kar azad kar de. Wala to usi ki hoti hai jo azad kare
.

Hum se Abu Nuaim ne bayan kiya, kaha ke hum se Abdul Wahid Bin Aiman ne bayan kiya ke mujh se mere baap Aiman (Radi Allahu Anhu) ne bayan kiya ke mein Aisha (Radi Allahu Anha) ki khidmat mein hazir hua aur arz kiya ke mein pehle Utba Bin Abi Lahab ka ghalam tha. Un ka jab intiqal hua to un ki aulad meri waris hui. In logon ne mujhe Abdullah Ibn Abi Amr ko bech diya aur Ibn Abi Amr ne mujhe azad kar diya. Lekin (bechte waqt) Utba ke warisou ne wala ki shart apne liye lagali thi (to kya ye shart sahi hai?) is par Aisha (Radi Allahu Anha) ne kaha ke Barira (Radi Allahu Anha) mere yahan aayi theen aur unhon ne kitabat ka mamla kar liya tha. Unhon ne kaha ke mujhe aap khareed kar azad kar dein. Aisha (Radi Allahu Anha) ne kaha ke mein aisa kar doon gi (lekin malikou se baat cheet ke baad) unhon ne bataya ke wo mujhe bechne par sirf is shart ke sath razi hain ke wala unhein ke paas rahe. Aisha (Radi Allahu Anha) ne kaha ke phir mujhe is ki zaroorat bhi nahi hai. Rasul Allah (Sallallahu Alaihi Wasallam) ne bhi ise sunaya (Aisha Radi Allahu Anha ne ye kaha ke) Aap ko is ki itla mili. Is liye Aap (Sallallahu Alaihi Wasallam) ne Aisha (Radi Allahu Anha) se daryaft farmaya, unhon ne soorat-e-haal ki Aap (Sallallahu Alaihi Wasallam) ko khabar di. Aap (Sallallahu Alaihi Wasallam) ne farmaya ke Barira ko khareed kar azad kar de aur malikou ko jo bhi shart chahein lagane do. Chunanchay Aisha (Radi Allahu Anha) ne unhein khareed kar azad kar diya. Malikou ne chunke wala ki shart rakkhi thi is liye Nabi Kareem (Sallallahu Alaihi Wasallam) ne (Sahaba-e-Karam Radi Allahu Anhum ke ek majma se) khitab farmaya, wala to usi ke sath hoti hai jo azad kare. (Aur jo azad na karein) agarche wo sau shartein bhi laga lein (wala phir bhi un ke sath qaim nahi ho sakti)
.