Hum se Muhammad bin Mehran ne byaan kiya , unhon ne kaha ke hum se Waleed bin Muslim ne byaan kiya , unhon ne kaha ke hum se Abdur Rahman bin Nimr ne byaan kiya , unhon ne Ibn Shihab suna , unhon ne Urwah se aur Urwah ne (apni khala) Ayesha Siddiqa razi Allahu anha se , unhon ne kaha ke Nabi Karim salla Allahu alaihi wasallam ne grahan ki namaaz mein qiraat buland aawaz se ki , qiraat se farigh ho kar Aap salla Allahu alaihi wasallam takbeer keh kar ruku mein chale gaye jab ruku se sar uthaya to «sami Allahu liman hamidah , Rabbana wa lakal hamd» kaha phir dobara qiraat shuru ki . Gharz grahan ki do rakato mein Aap salla Allahu alaihi wasallam ne chaar ruku aur chaar sajday kiye .

Aur Imam Awzai rahimahullah ne kaha ke main ne Zuhri se suna , unhon ne Urwah se aur Urwah ne Ayesha razi Allahu anha se ke Nabi Karim salla Allahu alaihi wasallam ke ahd mein sooraj grahan laga to Aap salla Allahu alaihi wasallam ne aik aadmi se elaan kara diya ke namaaz hone wali hai phir Aap salla Allahu alaihi wasallam ne do rakaten chaar ruku aur chaar sajdon ke saath parhin . Waleed bin Muslim ne byaan kiya ke mujhe Abdur Rahman bin Nimr ne khabar di aur unhon ne Ibn Shihab se suna , isi hadees ki tarah Zuhri (Ibn Shihab) ne byaan kiya ke is par main ne (Urwah se) poocha ke phir tumhare bhai Abdullah bin Zubair ne jab Madina mein «kusoof» ki namaaz parhayi to kyun aisa kiya ke jis tarah subah ki namaaz parhi jati hai . Isi tarah yeh namaaz «kusoof» bhi unhon ne parhayi . Unhon ne jawab diya ke haan unhon ne sunnat ke khilaaf kiya . Abdur Rahman bin Nimr ke saath is hadees ko Sulaiman bin Kaseer aur Sufyan bin Hussain ne bhi Zuhri se riwayat kiya , is mein bhi jahri qiraat karne ka byaan hai .