Hum ko Abdan ne Hadees bayan ki, unhein Abdullah bin Mubarak ne khabar di, un ko Younus ne, unhon ne Zohri se yeh Hadees suni. (Doosri sanad yeh hai ke) hum se Bishr bin Muhammed ne yeh Hadees bayan ki. Un se Abdullah bin Mubarak ne, un se Younus aur Ma’mar dono ne, un dono ne Zohri se riwayat ki pehli sanad ke mutabiq Zohri se Ubaidullah bin Abdullah ne, unhon ne Ibne-e-Abbas Radhiallahu Anhuma se yeh riwayat naql ki ke Rasoolulllah Sallallahu Alaihi Wasallam sab logon se ziyada jawwaad (sakhi) the aur Ramadhan mein (doosre auqaat ke muqaabla mein jab) Jibrael Alaihissalam Aap Sallallahu Alaihi Wasallam se mlite bahut hi ziyada jood-o-karam farmaate. Jibrael Alaihissalam Ramadhan ki har raat mein aap Sallallahu Alaihi Wasallam se mulaqaat karte aur Aap Sallallahu Alaihi Wasallam ke saath Quran ka daura karte. Gharz Nabi Kareem Sallallahu Alaihi Wasallam logon ko bhalaayi pahunchane mein baarish laane waali hawa se bhi ziyada jood-o-karam farmaaya karte the.