Aur Allah Ta'ala ne (Surah Yusuf mein) farmaya ”Jab Yusuf (Alaihis Salam) ne apne walid se kaha ke Ae mere walid! mein ne gyarah sitaron aur sooraj aur chand ko (khwab mein) dekha. Dekhta hoon ke wo mere aage sajda kar rahe hain. Wo bole: mere pyare bete! apne is khwab ko apne bhaiyon ke samne bayan na karna warna wo tumhari dushmani mein tum ko takleef dene ke liye koi chaal chal kar rahein ge. Beshak shaitan to insan ka khulla dushman hai aur isi tarah tumhara Parwardigar tumhein meri aulad mein se chun le ga aur tumhein khwabon ki ta'beer sikhaye ga aur jaise us ne apna ihsan mujh par aur tere dada par pehle poora kiya isi tarah tujh par aur Yaqub ki aulad par apna ihsan poora kare ga (paigambari ata kare ga) beshak tumhara Parwardigar bada ilm wala hai bada hikmat wala hai.“ Aur Allah Ta'ala ne (Surah Yusuf mein) farmaya ”Aur Yusuf (Alaihis Salam) ne kaha: Ae mere abba jaan! yeh mere pehle khwab ki ta'beer hai ise mere Parwardigar ne sach kar dikhaya aur usi ne mere saath kaisa ihsan is waqt kiya jab mujhe qaid-khana se nikala aur Aap sab ko jangal se le aaya aur baad is ke ke shaitan ne mere aur mere bhaiyon ke darmiyan fasad dalwa diya tha beshak mera Parwardigar jo chahta hai is ki umda tadbeer kar deta hai. Beshak wahi hai ilm wala, hikmat wala. Ae Rabb! Tu ne mujhe hukumat bhi di aur khwabon ki ta'beer ka ilm bhi diya. Ae aasmanon aur zameen ke Khaliq! Tu hi mera kaarsaz duniya o aakhirat mein hai. Mujhe duniya se apna farman-bardar bana kar utha aur mujhe saaliheen se mila de. «Fatir» «Badee'» , «Mubtadi'» , «Bari'» , «Khaliq» hum-ma'ni hain. «Bad'» , «Badi'ah» se hai yaani jangal aur dehat.