Hum se Umar bin Hafs bin Ghiyath ne bayan kiya kaha , ke mujh se mere walid ne bayan kiya , kaha ke hum se Amash ne bayan kiya , kaha ke hum se Ibrahim ne Aswad ke wastay se bayan kiya , unhon ne Aisha raziyallahu anha se doosri sanad aur Amash ne kaha ke mujh se Muslim bin Subaih ne Masrooq ke wastay se bayan kiya , unhon ne Aisha raziyallahu anha se ke un ke samne un cheezon ka zikr hua . Jo namaz ko tor deti hain yani kutta , gadha aur aurat . Is par Aisha raziyallahu anha ne farmaya ke tum logon ne humein gadhon aur kutton ke barabar kar diya . Halanke khud Nabi Karim salla Allahu alaihi wa sallam is tarah namaz parhte thay ke mein charpayi par aap salla Allahu alaihi wa sallam ke aur qibla ke beech mein leti rehti thi . Mujhe koi zaroorat pesh aayi aur chunke yeh baat pasand na thi ke aap salla Allahu alaihi wa sallam ke samne jab ke aap salla Allahu alaihi wa sallam namaz parh rahe hun baithun aur is tarah aap salla Allahu alaihi wa sallam ko takleef ho . Is liye mein aap salla Allahu alaihi wa sallam ke paon ki taraf se khamoshi ke sath nikal jati thi .

Hum se Ishaq bin Ibrahim ne bayan kiya , kaha ke humein Yaqoob bin Ibrahim ne khabar di , kaha ke mujh se mere bhatije Ibn Shihab ne bayan kiya , unhon ne apne chacha se poocha ke kya namaz ko koi cheez tor deti hai ? to unhon ne farmaya ke nahi , isay koi cheez nahi torti . Kyunke mujhe Urwah bin Zubair raziyallahu anhu ne khabar di hai ke Nabi Karim salla Allahu alaihi wa sallam ki zauja mutahhara Aisha raziyallahu anha ne farmaya ke Nabi Karim salla Allahu alaihi wa sallam khare ho kar raat ko namaz parhte aur mein aap salla Allahu alaihi wa sallam ke samne aap salla Allahu alaihi wa sallam ke aur qibla ke darmiyan arz mein bistar par leti rehti thi .