Hum se Qutaybah ne bayan kiya, kaha hum se Jareer ne bayan kiya, in se Shaybani ne, in se Ash-as bin Abi al-Shas-sa ne, in se Muawiyah bin Suwayd bin Muqarrin ne aur in se Bara bin Azib razi Allahu anhu ne bayan kiya ke Rasool Allah salla Allahu alaihi wasallam ne hamain saat baaton ka hukm diya tha. Beemar ki mizaj-pursa karne ka, janaze ke peeche chalne ka, chheinkne wale ke jawab dene ka. Kamzor ki madad karne ka, mazloom ki madad karne ka, ifsha-e-salam (salam ka jawab dene aur bakasrat salam karne) ka, qasam (haq) khane wale ki qasam poori karne ka, aur Nabi Karim salla Allahu alaihi wasallam ne chaandi ke bartan mein peene se mana farmaya tha aur sone ki angoothi pehnne se hamain mana farmaya tha. Maysar (resham ki zain) par sawar hone se, resham aur deebaj pehnne, qasi (reshmi kapra) aur istabraq pehnne se (mana farmaya tha).