Aur Allah Paak ne (Surah Yusuf mein) Yusuf alaihissalam ka qaul naqal kiya hai «izh-haboo bi-qameesee haazha fa-alqoohu ala waj-hi abee ya-ti baseeran» ke ”ab tum meri is qamees ko le jao aur is ko mere walid ke chehre par daal do to in ki aankhen bafazlihi Ta'ala roshan ho jayein gi .“

Hum se Qutaybah bin Saeed ne bayan kiya , unhon ne kaha hum se Hammad bin Salama ne bayan kiya , in se Ayub Sakhtiyani ne bayan kiya , in se Nafi ne aur in se Abdullah bin Umar razi Allahu anhuma ne ke ek sahab ne arz kiya: ya Rasool Allah! Muhram kis tarah ka kapra pehne . Nabi Karim salla Allahu alaihi wasallam ne farmaya ke muhram qamees , pajama , burnus (topi ya sar par pehnne ki koi cheez) aur mozay nahi pehne ga albatta agar usay chappal na milein to mozon hi ko takhnon tak kaat kar pehan le woh hi jooti ki tarah ho jayein ge .

Hum se Abdullah bin Muhammad Musandi ne bayan kiya , kaha hum ko Ibn Uyaynah ne khabar di , unhein Amr ne aur unhon ne Jabir bin Abdullah razi Allahu anhuma se suna , unhon ne bayan kiya ke Nabi Karim salla Allahu alaihi wasallam Abdullah bin Ubayy (munafiq) ke paas jab usay qabr mein dakhil kiya ja chuka tha tashreef laaye phir Aap ke hukm se is ki laash nikaali gayi aur Nabi Karim salla Allahu alaihi wasallam ke ghutnon par usay rakkha gaya Nabi Karim salla Allahu alaihi wasallam ne is par dum karte huay apni qamees pehnayi aur Allah hi khoob jaanne wala hai .

Hum se Sadaqah bin Fadl ne bayan kiya , kaha hum ko Yahya bin Saeed ne khabar di , in se Ubaidullah ne bayan kiya , kaha mujh se Nafi ne khabar di , in se Abdullah bin Umar razi Allahu anhuma ne bayan kiya ke jab Abdullah bin Ubayy ki wafat hui to is ke larke (Abdullah) jo mukhlish aur akabir sahabah mein thay Rasool Allah salla Allahu alaihi wasallam! ki khidmat mein hazir huay aur arz kiya: ya Rasool Allah! Apni qamees mujhe ata farmaye taake main apne baap ko is ka kafan doon aur Aap in ki namaz e janaza parha dein aur in ke liye dua e maghfirat karein chunanche Nabi Karim salla Allahu alaihi wasallam ne apni qamees unhein ata farmayi aur farmaya ke nahla dhula kar mujhe ittila dena . Chunanche jab nahla dhula liya to Nabi Karim salla Allahu alaihi wasallam ko ittila di Nabi Karim salla Allahu alaihi wasallam tashreef laaye taake is ki namaz e janaza parhayein lekin Umar razi Allahu anhu ne Aap ko pakar liya aur arz kiya: ya Rasool Allah! Kya Allah Ta'ala ne Aap ko munafiqeen par namaz e janaza parhne se mana nahi farmaya hai ? Aur farmaya hai «istagh-fir lahum au la tastagh-fir lahum in tastagh-fir lahum sabeena marratan falan yagh-fir-allahu lahum» ke ”in ke liye maghfirat ki dua karo ya maghfirat ki dua na karo agar tum sattar martaba bhi in ke liye maghfirat ki dua karo ge tab bhi Allah unhein hargiz nahi bakhshe ga .“ Phir yeh aayat nazil hui «wala tusalli ala ahadim-minhum maata abadan» ke ”aur in mein se kisi par bhi jo mar gaya ho hargiz namaz na parhiye .“ Is ke baad Nabi Karim salla Allahu alaihi wasallam ne in ki namaz e janaza parhni chhorr di .