Hum se Ali bin Abdullah Madini ne bayan kiya ke kaha hum se Sufyan bin Uyaynah ne Yahya bin Saeed Ansari ke wastay se , unhon ne Umra bint Abdur Rahman se , unhon ne Aisha raziyallahu anha se . Aap ne farmaya ke Barira raziyallahu anhu londi un se apni kitabt ke baray mein madad lene aayen . Aisha raziyallahu anha ne kaha tum chaho to mein tumhare malikon ko yeh raqam de dun aur tumhein azad kara dun aur tumhara wala ka taluq mujh se qaim ho . Aur Barira ke aqaon ne kaha Aisha raziyallahu anha se ke agar aap chahen to jo qeemat baqi reh gayi hai woh de den aur wala ka taluq hum se qaim rahe ga . Rasool Allah salla Allahu alaihi wa sallam jab tashreef laye to mein ne aap salla Allahu alaihi wa sallam se is amr ka zikr kiya . Aap salla Allahu alaihi wa sallam ne farmaya ke tum Barira ko khareed kar azad karo aur wala ka taluq to usi ko hasil ho sakta hai jo azad karaye . Phir Rasool Allah salla Allahu alaihi wa sallam minbar par tashreef laye . Sufyan ne is hadees ko bayan karte hue ek martaba yun kaha ke phir Rasool Allah salla Allahu alaihi wa sallam minbar par charhay aur farmaya . Un logon ka kya haal ho ga jo aisi sharaet karte hain jin ka taluq kitab Allah se nahi hai . Jo shakhs bhi koi aisi shart kare jo kitab Allah mein na ho is ki koi hesiyat nahi ho gi , agarche woh sau martaba kar le . Is hadees ki riwayat Malik ne Yahya ke wastay se ki , woh Umra se ke Barira aur unhon ne minbar par charhne ka zikr nahi kiya al-khair .