Is baare mein Ibn Umar razi Allahu anhuma ne Nabi Karim salla Allahu alaihi wasallam se riwayat naqal ki hai .

Hum se Musaddad ne bayan kiya , kaha hum se Abd-ul-Waris ne bayan kiya , in se Abdul Aziz ne bayan kiya ke Anas razi Allahu anhu ne kaha main ne Nabi Karim salla Allahu alaihi wasallam ko lehsun ke baare mein kuch kehte nahi suna . Albatta Aap salla Allahu alaihi wasallam ne farmaya ke jo shakhs (lehsun) khaye to woh hamari masjid ke qareeb na aaye .

Hum se Ali bin Abdullah ne bayan kiya , kaha hum se Abu Safwan Abdullah bin Saeed ne bayan kiya , kaha hum ko Yunus ne khabar di , in se Ibn Shihab ne bayan kiya , in se Ata ne bayan kiya ke Jabir bin Abdullah razi Allahu anhuma kehte thay ke Nabi Karim salla Allahu alaihi wasallam ne farmaya ke jis ne lehsun ya piyaz khayi ho to usay chahiye ke hum se door rahe , ya yeh farmaya ke hamari masjid se door rahe .