Hum se Ishaq bin Nasr ne byaan kiya, kaha hum se Husain Jaf-ee ne byaan kiya, un se Za'ida ne, un se Maysarah ne un se Abu al-Hazim ne aur un se Abu Hurairah razi Allahu anhu ne ke Nabi Karim salla Allahu alaihi wasallam ne farmaya ke jo shakhs Allah aur Qayamat ke din par iman rakhta ho woh apne parosi ko takleef na pahunchaye aur main tumhein. (baqiya agli hadees dekhein).

Auraton ke baare mein bhalayi ki wasiyat karta hoon kyunke woh pasli se paida ki gayi hain aur pasli mein bhi sab se zyada teerha is ke oopar ka hissa hai. Agar tum usay seedha karna chaho ge to usay torr daalo ge aur agar usay chhor do ge to woh teerhi hi baqi reh jaye gi is liye main tumhein auraton ke baare mein achhe sulook ki wasiyat karta hoon.

Hum se Abu Naeem ne byaan kiya, kaha hum se Sufyan Sawri ne byaan kiya, un se Abdullah bin Dinar ne aur un se Ibn Umar razi Allahu anhuma ne byaan kiya ke Nabi Karim salla Allahu alaihi wasallam ke waqt mein hum apni biwiyon ke saath guftagu aur bahut zyada be-takallufi se is darr ki wajah se parhez karte thay ke kahin koi be-iatidali ho jaye aur hamari burayi mein koi hukm nazil na ho jaye. Phir jab Nabi Karim salla Allahu alaihi wasallam ki wafat ho gayi to hum ne in se khoob khul ke guftagu ki aur khoob be-takallufi karne lage.