Kaha hum se Hasan Bin Bashir ne bayan kiya, un se Usman Bin Aswad ne aur un se Ibn Abi Mulaikah ne bayan kiya ke Muawiyah Radi Allahu Anhu ne Isha ke baad witr ki namaz sirf ek rakat parhi wahin Ibn Abbas Radi Allahu Anhuma ke Maula (Kuraib) bhi mojood thay, jab wo Ibn Abbas Radi Allahu Anhuma ki khidmat mein hazir hue to (Ameer Muawiyah Radi Allahu Anhu ki ek rakat witr ka zikr kiya) is par unhon ne kaha: Koi haraj nahi hai, unhon ne Rasul Allah Sallallahu Alaihi Wasallam ki suhbat uthayi hai
.

Hum se Ibn Abi Maryam ne bayan kiya, kaha hum se Nafi Bin Umar ne bayan kiya, kaha mujh se Ibn Abi Mulaikah ne bayan kiya ke Abdullah Bin Abbas Radi Allahu Anhuma se kaha gaya ke Ameer-ul-Momineen Muawiyah Radi Allahu Anhu ke mutaliq aap kya farmate hain, unhon ne witr ki namaz sirf ek rakat parhi hai? Unhon ne kaha ke wo khud faqeeh hain
.

Mujh se Amr Bin Abbas ne bayan kiya, kaha hum se Muhammad Bin Jafar ne bayan kiya, kaha hum se Shuba ne bayan kiya, un se Abu-at-Tayyah ne bayan kiya, unhon ne Humran Bin Aban se suna ke Muawiyah Radi Allahu Anhu ne kaha tum log ek khaas namaz parhte ho, hum log Nabi Kareem Sallallahu Alaihi Wasallam ki suhbat mein rahe aur hum ne kabhi Aap Sallallahu Alaihi Wasallam ko is waqt namaz parhte nahi dekha, balkay aap ne to is se mana farmaya tha. Muawiyah Radi Allahu Anhu ki murad Asr ke baad do rakat namaz se thi (jise is zamane mein baaz log parhte thay)
.